Tamezwarut
الأولى
Homepage
Murakuc
المغرب
Morocco
Dzayer
الجزائر
Algeria
Lmed Tamaziɣt
تعلم الأمازيغية
Learn Berber
Tamkaṛḍit Tamaziɣt
المكتبة الأمازيغية
Berber library
Amawal Amaziɣ
القاموس الأمازيغي
Berber dictionary

Aṣlaḍ n yan wedlis nna umi tedrus tɣoṛi

 
Muḥemmad Aɣezzaf

 

13 Yebrir 2016

 

Aṣlaḍ n yan udlis nna mi tedrus tɣuṛi

 

G ukud nna di-s gern itsen imedcalen Imaziɣen s uɣanib nsen aha llfen i tirra s Tmaziɣt ibendeg yan ittarun g yat tiɣmeṛt illasen s wudem nna isenḥuffer aha iẓṛeg tirra nnes s iles ddeɣ, s udalif nnes Tifinaɣ. Tga tirra nnes anagif s usaɣra n Tizi n Ticka.

 

Unna iɣṛan asaɣṛa ddeɣ ad yiɣil is ar isawal udlis ɣif tizi tumlitt (célèbre) ittawin s warzazat mi da qqaṛn imaziɣn Tizi n Ticka aha issefra t netta s iles Aɛṛab s « فج التيه ».

 

Maca adlis ur ar isawal ɣif tizi ddeɣ. Dat n wad ssiggeɣ ɣif ugabir (le contenu) n unagif (le roman) ad, yuf is beddiɣ ɣif unaba n Tizi d Ticka. Tizi tga abrid ikkan ger tqeccumin (les sommets) n idraren, tga awed yat tifrekt n wukud nna issikka cra. Ticka tga ad yack kra neɣ ad yacc s unaba n wad iɣenḍeṛ, ad ur yaf abrid t ittraran s dinna g iserra.

Tizi n Ticka tga ansa neɣ ukud nna g ijla ca abrid nnes. May d ijlan g ubrid?

Matta ubrid nna ijlan? May d imes wanna neɣ tanna ijlan abrid nnes?

Dat n wad rareɣ ɣif iseqsiten ad yuf is snummeleɣ adlis: Aneck n udlis iga amerwasu, tasniwin nnes lekment attayen n 267 n tesna.
Anil (la couleur) nnes iga abelbas (gris).
G iɣef n usatil (astul) itteyara s Tfinaɣ: «Anagif s iles Amaziɣ s udalif nnes Tifinaɣ», mnid as ittyara s Teɛṛabt:

 قصة باللغة الأمازیغیة بأبجدیتھا تفناغ

Afella n usaɣra (proposé pour le titre) yan uwalif aṛɣaɣay (doré) n yan wagal (pendentif) ɣif udem n yaz ittyara s usekkil Alatin «Amazigh» g tiyenna n ugalim (adjectif) ddeɣ sin iskkilen n yaz ɣif yat teɣda tucgigt (horizontale) iggran s yat twinest icermen agal ad s yan useddi (chaîne) mi ur ifrir (ne pas apparaître) xas idir nnes. Awalif illa ɣif usanaz n uɣmaṛnam (proposé pour rectangle) aṛɣaɣay.

 

Ddaw uwalif ittyara s Tfinaɣ: Anagif, ddaw as s Tfinaɣ diɣ: Tizi n Ticka, s Teɛṛabt: فج التيه

G uzeddir nnes yat tesfift n isuniz iseɣcalen (bande de figures géométriques).

 

Ddaw tesfift ittyara s Tfinaɣ assaɣ n umedcal d imir n uẓṛag n udlis:

ⴰⵖⴰⵣⴰⴼ ⵎⵓⵃⵎⵎⴰⴷ
ⴰⵏⴻⴱⴷⵓ ⵏ ⵓⵙⴳⴳⵯⴰⵙ 2964 / 2014

Ɣ usatil (astul) amazdar ittubder wassaɣ n tnejjawla (maison d’impression) d tansa (adresse) nnes d uyanin (le numéro) n uganaẓ (proposé pour le téléphone) d win ufakes d win umyazan n ugratsa (internet), g tiyennit n uya tadugamt (le
symbole) n uḥadam (l’institution) ddeɣ illan ɣif udem n tafuyt d iẓenẓaṛn nnes, zeg wammas nnes ar uzeddir ittyara s twenɣa (graphie) tazurart asekkil Ulatin A g idis nnes asekkil Aɛṛab ɛ.

Iskkilen ad gan tanta (le début) n wassaɣ Aɛṛab عین d Umaziɣ s usekkil Alatin: Aserdun. Assaɣ ad iga win n tnejjawla ijewlen adlis waniti.

 

Ddaw tesfift nna ittusnummlen ittyara s iles Aɛṛab atig n uzenzi: .ثمن البیع

Aṣlaḍ n walil (la scène) n udlis:
Inilen n usatil gan abelbas (gris) d uṛɣaɣay (doré) d ubxxan, awṛaɣ, ukziy (bleu) d umlil. Abelbas iga inil n usatel asel n uwalif, aṛɣaɣay iga win uwalif igebren yan wagal ɣif udem n yaz izdiyen d yat twinest n useddi. Abexxan iga win tassfift s
udmawen nnes iseɣcalen d tirra issusun s wanag n ufares aseklan, s usaɣra n unagif d wassaɣ n bab nnes d uzmez n ujwal (impression) nnes.

 

Inil abelbas ar aɣ issectay iɣed, iɣed iga tamatart n usekkin nna ikemḍen s takat. Abelbas ar ittini is ikka wafa aha ijder cra n usekkin, kud ixsey izrey iɣed, maca da ittili ilekmimeẓ (braise sous la cendre) ddaw iɣed, ra ad issiɣ takat iɣ t isnucceg kra
neɣ t ismentes (attiser).

Inil aṛɣaɣay ar aɣ issectay uṛeɣ d izuzaf (les parures) neɣ agalen. Inil abexxan ar aɣ issectay tallest d ukud n yiḍ.


Inil ukziy ar aɣ issectay igenna.
Inil umlil ar aɣ issectay asidd d ukud n wasef neɣ ass neɣ azal.


Inil awṛaɣ iga win iẓenẓaṛen x wukud n utwan n tafuyt (le coucher de soleil) neɣ win unqqeṛ (le lever de soleil).


Ar nettacez aṭṭas inil waniti g imruriɣen n tafuyt adday taẓ ad tetwen.

Agal aṛɣaɣay (le pendentif doré) iga asekkin nna ihekkec uhekkac zeg ugeṭṭum n wuṛeɣ nna issefsey aha ifka as udem n usakil «yaz» s Tfinaɣ igan tadugamt n tullut (l’existence) d tnettit (l’identité) n Imaziɣen, aha igzey (graver) ɣif teɣda illan ammas nnes agalim n Umaziɣ s usekkil Alatin ittinin is iga Umaziɣ azrarag (Libre), aha izdey agal ad s twinest (anneau) ur igin xas yan uferdas n useddi as inna ad ittyagel ɣif ugeṛḍ n wanna isbijjigen (être fier) s uṭekki (appartenance) nnes s umisi (essence) Amaziɣ. Mar ad isunez (former) uhekkac aya ur ittuyaqqil zi takat.

Takat da tessenwa, da tesseṛɣa maca da tessekmaḍ. Tga tadugamt n tudert d umtan, n tullut d uslubbeḍ (le fait d’anéantir), n uluddu (le fait d’être tiède) d ustaḥ (le fait d’être calme) d ugerwel (la révolution) minzi ar tesmuttuy itsen isekkinen iquṛaṛen s isekkinen uḍɣiɣen d iḥrarayen, ar tesseqlulluy asanaz nsen.

Iɣed iffren ilekmimẓ ifka tudert i Umaziɣ alley issefra imisi nnes s usakil nna ikka iɣna aha ig t d tdugamt n tullut d tudert nnes. Hat s ilekmimeẓ as isunez agal nnaɣ t icermen d umisi d tnettit nnes.

Mec as yucer cra agal nnaɣ ad isnucceg iɣd aha ismentes timsi issekmaḍen imicer.

Tasfift s wudmawen nnes iseɣcalen imezarayen tga tadugamt n wukud, n udayin (l’histoire), n uzra (le passé), n umha (le présent) d imal (au sens figuré de l’avenir).

Inil nnes abexxan ar ittini is iqqima udayin (histoire) n Imaziɣen idnunes iddeɣ ayenna kkan arun ittusenhubber, ur sawilen ɣif umisi d tnettit nsen, mriddi udmawen iseɣcalen n usakil nsen ittugziyen g imeddurga, ur nnin ad isinen iwdan yaḍen is kkan lan amm imudinen yaḍen tiɣɣuṛma.

Ɣ taɣzi n wukud iwwet Umaziɣ ɣif timmuzɣa d tiddurfa (la liberté) d timmuzwa (la dignité) nnes maca ur isawil ɣif iɣef nnes.

Agabir n unagif:

Ittuselmes (être axé) ɣif usda (la réalité) d ugengif (l’imaginaire), iga aṣeṭṭa isman mennaw n ifilan. Asaṛiḍ udsil (la cause fondamentale) n aferkuẓeḍ (le chômage) n widda kkan azizar (l’université) aha ur ufin ansiwen nsen g wamun.

Tifri n uṣaṛiḍ g uraɛa n umedcal tbedda ɣif ubuẓẓen (la reconnaîsance) n uwanik (l’état) s tiddulsa Tamaziɣt. Mer ibuẓẓen uwanik s umsunez (le composant) ad yaf umezraw (l’étudiant) n iles Amaziɣ d tdelsa nnes ansa nnes g tmazirt d
wamun nnes. Iddeɣ g uzizar ur ar ittezraw xas ilsawen n imezda (les étrangers) d wusunen yaḍen hat idrus ad yaf bab n ugardas amajjyal neɣ lal nnes aḍɣaṛ nnes. Ar ittafa uferkaẓaḍ iɣef nnes ger uḍulley (la necessité) n uswihhet (la protestation) d twargit n tzugi (l’émigration) s tmizar tinfurin (étrangères). Aya
ayed isman yat tarrbiɛt nna yusin agardas (le diplôme) amajjeyal. Iga «Baddu» yan dig-sen.

Iwariken udsilen:
*Asdarray Afṛanṣiṣ d Usbaniy: Ikka ku yuk dig-sen isdurrey yan waẓey zi tamazirt n Umerrakuc (Murakuc).

*Anezbay: Iga t imirew n «Baddu» d ismun nnes. Netta ayed ikẓeɛ asdarray Afṛanṣiṣ d Usbaniy zi tmazirt

*Baddu: ila agardas nnes amajjyal g tsekla Tafṛanṣiṣt, ur yufi tawuri, ar ittdelfaq g uzeglal, iɣzel x yat tɛerrimt, izutef (découvrir) is tga tameṛḍunt (prostituée), ixyeḍ (s’énérver), inges (être choqué), yulla s imṭṭawen irzagen (amers), ar ittxmmam ad inḍew s agemmaḍ in.

Incer ar itturu tibratin i medden maca ur as fkin alik (le salaire) nnes acku ɣalen is ar ittawes (aider) i iregmayen (les anaphabètes) s ubennen (gratuitement). Ittyaṭef netta d usmun nnes iɣetsen (décider) ad izzenz idlisen iqbuṛen nna ikka ila. Amules (l’accusation) ixater iddeɣ issufeɣ usmun nnes idlisen ikkaten ɣif umluleḍ uɛaseq (matérialisme dialectique). Iffeɣ tanessaṛḍa (proposé pour le tribunal) netta d usmun nnes iddeɣ lekmn ad zunẓun (convaincre) afesṛaḍ (proposé pour le juge) s timmulsa (l’innocence) nsen zeg ulfan (l’accusation) n ubeɣles (proposé pour la police) nna iɣal is ran ad sretlen (constituer) amataɣ amenkas urkis (le parti opposant clandestin), nnaṛeẓmen s uretbey (la caution). Ur yad yufi ibba nnes xas ad iddu s tneddarma (proposé pour la banque) mar ad as teṛḍel sin igendiden (millions) n isentimen. Xas yumeẓ ten «Baddu» iɣal is yumeẓ tasarut n umradan (le paradis). Iddu ar issara ɣif iberɣazen (les courtiers) issenḍawen. Iddeɣ tesḍeṛɣel (aveuglir) twargit tawengimt (au sens de raison) nnes yaɣ taraksut (le piège) n iɣejbab n (les escrocs) nna nnḍen is, sduhdun t aha gren is ammas n idraren. Kud yucey iɣal is inḍew s dar iwdan
infurn, maca xas ifrek issen is ur iffiɣ tamazirt, is awal nna s da sawalen winna t yufan ur igi xas win imarwen nnes, Tamaziɣt, ixyeḍ, inges. Ar as tteggan imezdaɣ n udrar amulley n tiremt. Izutef dinnaɣ yat tselmadt ikkan aẓaɣaṛ, aha ur ǧǧin tessinen i Tmaziɣt, aha telmed as, ar si-s tessefru Taɛṛabt ammas n tdala (salle d’étude), teqqim ammas n ibudraren, ar tzeddem amm tsednan, ar tfeṛṛeḍ, tman d itsent tamunt n uɣɣu d waman.

Tiws as s iwalifen, maca ur ti teffiɣ twargit n tzugi. Kud iman id-s yan umezdaɣ mar ad yisin tamazirt, yufa iḥewwaṣen g
igelẓan (les cascades), innarez ad imyassan d yat tefṛanṣiṣt mar ad t tessenḍew s tmazirt nnes maca tenna as is as yuf ad iqqim g tmazirt nnes ifulkiyen.

Tlula twargit diɣ n wad iccur tudert d tselmadt, iddeɣ imsasa d tneddarza (proposé pour la commune) ɣif wad isselmed ayenna mi issenn i warraw d tarrawin nsen.

Issegra unagif s twargit n wad ifru amerwas n ibba nnes, n wad iqqim g tmazirt nnes, n wad imɛafar d ukud s usemsi (l’investissement) n iqaṛiḍen nnes.

Iffeɣ Tizi n Ticka s tin imnayen.

*Sekku: Amercal n «Ɛbita», Imirew n «Baddu», ikka iga anezbay alley tesrar tmazirt izireg nnes (l’indépendance), ur iḥmil ad izzenz iger nnes n taddant (l’olivier), s iɣnan as iṛḍel zi ɣuṛ tneddarma ma s ira iwi s ad izug. Yuzzla ffir memmi-s kud ittyaṭṭef alley innaṛẓem.

*Ɛbita: tamercilt n «Sekku» d timirewt n «Baddu»: tusey anezwum n uxfeddi (fils aîné) nnes, ixub as waḍu, tulla s imṭṭawen irzagen, texbubec tayjayin nnes (s’égratigner les joues), temḍaṛa (être solidaire) d iwis s uqaṛiḍ nna tesmutter.

Tebḍa tawuri nnes ger umercal nnes d warraw d tarrawin nnes.

*Cerru: iga asmun n uswihhet,ittudelqm amm «Baddu» .Iɣts ad izzenz idlisn nnes iqbuṛn far ad yaf ma s ittedder.Itteyaṭṭef s umules axatar t igan asertel n umataɣ urkis, s umules uḍṛiṛ (déclaré) t igan azenzi g wansa unbiz (publique) asl n ussewrey (l’autorisation) n uqarid adigan (l’autorité locale).Innaṛẓem s uretbey.

*Baɛɛu neɣ «Butezrut»: iga asmun n «Baddu» g uswihhet d iẓeṛ, maca imzaray d «Baddu» g tudest n umkiṭṭef arendad n useḍwel n tirbatin, idda g ubrid n ujendex (la violence) far ad issenfel udem n wamun, idda g ubrid n usermumeɣ (le terrorisme) taf ad israr tirbatin s ubrid inmen. Ur izmir «Baddu» ad t iẓẓunẓu s
tudest n uduney (le dialogue).

*Tunaṛuẓ: tga tagẓiwt nna gi-s iɣzel «Baddu» maca izutef gi-s is tedda g ubrid ifeṛɣen. Kud as iger itnan, tenna as s usfenẓey (franchement) is ur tsala awal, is tettuṭfaṛ s imawen n igujilen igan ayetma-s, is tla tawuri ddeɣ mar ad ttaf ma s tessudur igujilen nna as izrey ibba nnes ɣif tadawt nnes.

*Ibeɣlasen: Mulsen «Baddu» d usmun nnes s usertel n umataɣ urkis, s uzenzi n idlisen g wansa unbiz asel n ussewrey.

*Afesṛaḍ :Iṛẓem i «Baddu» d usmun nnes s uretbey.

*Iɣejbab: Gan iseqlafen, smunnḍen «Baddu» alley idduhda aha gren t ammas n idurar.

*Imezdaɣ n udrar: Neṣfen s «Baddu» kud ifrek s usaris nnes amaynu, gan as amulley n tiram, msasan-d id-s ad asen isselmed arraw d tarrawin nsen s tamennida n yan walik. Issemyassan t yan dig-sen d tselmadt. Isneɛd as igelẓan nna da ttekkan
infuren.

*Asmun n ubrid: isenɛd i «Baddu» igelẓan (les cascades), issusen as taselmadt.

*Argaz awessar: isawel i «Baddu» f yan ugerwel adigan (la revolution locale) arendad (vis-à-vis) n uwanik.

*Aselway n tɣiwant: imsasa d «Baddu» ɣif wad isselmed i tarwa n uyetmi (la tribu) ayenna mi issen s tamennida n urakid.

*Taḥewwaṣt tafṛanṣiṣt: Innarez di-s «Baddu» ad t issenḍew s agemmaḍ in. Tefka as yan wazan is as tfulkey tmazirt nnes, is ar tnezzeɣ infuren s uhuskey nnes.

*Taselmadt: Tedda-d zeg uẓaɣaṛ s udrar taf ad tesselmd arraw d tarrawin n wusun. Telmed i Tmaziɣt, teɣtes ad teqqim ammas n Imaziɣen d Tmaziɣin, ar teskar tawuri n tsednan. Tuwes i «Baddu» s iwalifen ma s ittili tawuri n uselmed. Tga
tawargit tamaynut n «Baddu».

Azda ger usaɣra d ugabir n unagif:

Asaɣra iga tugḍiwt (résumé) n ugabir, neɣ tanibba issiggan ɣif-s. Tizi n Ticka ur ar ttini ansa ittawin s Warzazat, ar ittini ayajir nna gi-s yucka cra. Awanik d amezwaru ay d-yuckan kud ur ibuẓẓen s tiddulsa Tamaziɣt, aha ira ad izdey tamazirt s imineg neɣ s utaram alley tucka tsuta n ffir iziɣeg ger tadelsa Tafṛanṣiṣt d tdelsa Taɛṛabt d Tasbaniyt aha yili may d-yucka g usamik uslim anesbabaɣ iran ad ismuttey udem n wamun s usermumeɣ acku awanik ifka asidd azegzaw i usamik (la doctrine) uslim far ad igley (bloquer) asamik anemlalay (la doctrine socialiste), ad
as iwwet awettu aha ur idmi ad as ilal udensur anermamaɣ t isediddiyen netta nnit.

Mer ibuẓẓen uwanik zi tizwiri s umsunez Amaziɣ adyali ur tenni tsuta tamaynut ad tedder amarin n uferkuẓeḍ, ad temcacka d tnettit nnes, ad teqqim g tmazirt nnes, ad tcebber g iẓeɣṛan nnes. Hat iddeɣ iɣtes «Baddu» ad iqqim dinna teɣtes ad teqqim tselmadt nna ur ǧǧin tessin i Tmaziɣt as yufa abrid inmen ittawin s wabuḍ n tmazirt d taysi nnes.

Aya ay d-igan arudzem i umarin (la crise) (la
solution) n uferkuẓḍ, i ticka ger iberdan, ad yuɣul ku yuk, ku tukt s iẓeɣṛan nnes. Awed yan waddag ur inni ad ifek agummu d imula nnes mec ur icbbir g iẓeɣṛan nnes.Wadda ittwargan s ufeṛnuneṣ yucka amm wanna ittwargan s Uɛṛuṛeb (l’Arabisme), d wadda ittwargan ad issebḍey iɣef nnes far ad issermumeɣ
iwdan.Wanna israren iẓeɣṛan n Timmuzɣa wan «Baddu» d tselmadt ayd yufan abrid aṭemnan ittawin s ubenɣel (la stabilité) d uḥeḍṛen (la paix).

Amaziɣ amennuṛẓem, icebbren s tnettit d tdelsa d tɣeṛma nnes, ur yugin ad yisin tidelsiwin yaḍnin, d walsiwen, igan aneslam, ur inqqan iɣef nnes d wiyyaḍ, issnen iwetta nnes, iṭṭeffuṛen
tudest (proposé pour la méthode) n uduney d uẓunẓu ur id abrid n usermumɣ.

*Akud: Ur ittubdir s useffenẓey, maca ittusken s imec arusrid zeg wammas n yan wasar, iga t azenzi n idlisen ittmukkulen s uswingem anemlalay (la pensée socialiste) iddeɣ yuser bab nsen zeg yan waẓey idrimen id zeg wayyaḍ iddeɣ ur yad sufiren i umya minzi ttusrey tamunt n isufyat. Akud s umata (en général) iga win umkiṭṭef (la lutte) ger udensir anedgagar (capitaliste) d unemlalay (socialiste), nna gi-s iman umezwaru g tmazirt nna gi-s uhedrun (la religion) uslim d yan usamik (la doctrine) nnes neɣ uggar mar ad igley agusif (le torrent) anemlalay ad yuɣul s
teɣbalut nnes. Adensir ddeɣ n uwanik issefra t ubeɣlas kud issuffra f «Cerru» ad ur izzenz idlisen ittasin aswingem uslim g wallad n wad izzenz widda ittasin aswingem anemlalay. Akud waniti n umkiṭṭef ger wanagen ittmmennagwan (qui
s’opposent) n uswingem, ger sin icenga ur immsaḥmalen ar iglley abeɣles ad isserbu i ku wadda yusin timitar n uswingem anemlalay ayenna mi ur tezḍaṛ tadawt nnes ad t i tasey. Minzi awanif n ubeɣles ad isfeḍ timitar n uswingem ddeɣ zeg
wudem n wamun. Ar isseɣṛaṛ (ar iggar g teɣṛaṛt) ilafinen (les accusations) nnes taf ad ur icbber awedyan meqqaṛ d xas g yan ifili n uswingem waniti igan acengu axatar n udguger (le capitalisme). Mar ad ittusḍureg (être bloqué) usamik anemlalay
iṛẓem uwanik i udefrir nnes uslim maca ur idmi ad as d iffeɣ s wudm n uweddin (fantôme) isdiddiyen (menaçant) tamazirt acku da ikkat titi n uḍeṛɣal ur yucizen acengu nnes zeg umeddakkʷel nnes.

*Ansa: Ittubder s imec arusrid (de façon indirecte) zeg usaɣra «Tizi n Ticka» meqqaṛ ur da isawal unagif f uḍɣaṛ ddeɣ, d zeg wammas n yat tuskint «Tizi n Imnayen» g twargit n «Baddu». Ayenna ittinin is ammuttey zeg uzmez n ticka s uzmez n imnayen iniyen iyysan n tmazirt, issnen matta nitni d ma s ddan d mayed ran, yusin timitar n uburez isul iga tawargit maḥedd ur irar uwanik n tmazirt asidd nnes s umalu isulen iddlen tabaynut Tamaziɣt taf ad t issen ku amezdaɣ d tmezdaɣt n tmazirt.

Ittubder s imec amatan (général) g idurar, ɣ iẓuɣiṛ, g uzeglal n
tiɣṛmt, g ir n uzeglal ddeɣ, x usarag n tnezzarfa, g ustum n ugmmaḍ in, ɣ igelẓan, g uɣerbaz,  x iger n taddant.

Idurar gan tabaynut n timmuzɣa, gan izeqriren (remparts) nna isulen iḥbibḍen (conserver) s ik ujbiḥ (découvert) timitar n
tɣeṛma Tamaziɣt, nna gi-sen sulen imezdaɣ ar ttemsawalen s Tmaziɣt ur id amm uẓaɣaṛ g ttenyuddun itsen ilsawen iṛeṣliyen d infuren.

Iger n taddant (addag n uqezmur) iga iger yakkan azatim n uqezmur (aqaw n uzemmur). Iga tadugamt n tmazirt ibeddan f tuẓẓut n waddagen, d usifes (la culture), d usegmi n wactal (bétail), tamazirt nna issexrer (libérer) «Sekku» d ismunen nnes inezbayen. Azeglal n tiɣṛemt nna gi-s imḍey «Baddu» tirmit n uɣzal nnes d ubeytel n uzutef nnes. Asarag n tnezzarfa nna gi-s iswihhet netta d ismunen nnes. Ir n uzeglal nna gi-s ittyaṭṭef netta d «Cerru». Astum n uṛubbu nna igan tawargit n mennaw n iɛerrimen d tɛerrimin ur yufin ansa nsen g tmazirt nsen. Igelẓan nna gan yat zi tmitar n uhuskey n tmazirt, nna da inezzɣen allen n iḥwwaṣen infuren.

Aɣerbaz iga ansa nna g immyassan «Baddu» d tselmadt, nna g tlula twargit tamaynut nnes, aɣayan (le virage) nna t israren s ubrid ittawin s wabuḍ n tmazirt nnes.

*Azda n isarn d usda:

Ayenna yaɣen «Baddu» d ismunen nnes isul da ittusday (se produire) s dɣi.

Awed ayenna t yaɣen f ufus n uɣejbab ikka yaɣ. Xas alfan (accusation) n ubeɣlas izdiyen s usertel n umataɣ amenkas urkis ayed igan agengif mac ur ikkul ad isxiter ubeɣlas tulfint nnes taf ad issiwed. Amm uya ikka iga asda ɣ uncek n tugga n ifasiken (les victimes) n wukud n uldun.

Aɣezzaf Muḥemmad. Tafsut n 2966 / 2016

 






azmez - the date  
 

 
Iwenniten n imeɣṛan
تعليقات القراء
Readers' comments


comments powered by Disqus
 


Tamezwarut
الأولى
Homepage
Murakuc
المغرب
Morocco
Dzayer
الجزائر
Algeria
Lmed Tamaziɣt
تعلم الأمازيغية
Learn Berber
Tamkaṛḍit Tamaziɣt
المكتبة الأمازيغية
Berber library
Amawal Amaziɣ
القاموس الأمازيغي
Berber dictionary