Tamezwarut
الأولى
Homepage
Murakuc
المغرب
Morocco
Dzayer
الجزائر
Algeria
Lmed Tamaziɣt
تعلم الأمازيغية
Learn Berber
Tamkaṛḍit Tamaziɣt
المكتبة الأمازيغية
Berber library
Amawal Amaziɣ
القاموس الأمازيغي
Berber dictionary

S Tmaziɣt Tacawit: Amma ttilin yisekwan n Tmaziɣt i yigurdan



 
Sumiya Ḥeṛṛat

S Tmaziɣt Tacawit: Amma ttilin isekwan n Tmaziɣt i yigurdan


(Amur amezwaru: asewjed d uheyyi)

 

Azmez: 5 Mares/Krayur 2016
Aɣbalu: www.inumiden.com

 

Sumiya Ḥeṛṛat

(Taselmadt n Tmaziɣt – Awras, Dzayer)

 

Hagiti n yisekwan i deg kkiɣ zdat n way llan id n yigurdan, tarmit inu id-sen terni deg-i labas xaṭer edderri n wussan a d imizragen ḥercen ujren ayt zik deg ufadi nsen i welmad aled ad ilint tugnatin d wallalen i iqadan.

Ɣer-i azal n 6 d iseggasen u neč sselmadeɣ tanga n Tmaziɣt deg uɣerbaz alemmas mani iqeddacen ttilin jar n 11 d 15 n yiseggasen, tarmit a ay teǧ ad iniɣ taguzdit a terhif nezzeh texs ahaḍi d unṭhelli ɛerrem, ad naf di-s iqeddacen ttengugan jar n umaḍal n temzi d umaḍal n temɣer d way aten yeǧǧin mlexḍan deg tilla nsen u yettɛanad amezzyan ssi-sen ameqqran u d way ay yellan ad t-nfares deg yirmuda am usekwan n Tifinaɣ i yigurdan, imeqqranen lemmden fisaɛ u imezzyanen xsen ad aten ɛanden u ma yessefti umsuddes way manek yuma at ad yaxleḍ ɣer yiswan n usekwan.

Deg tedwint a ad ɛerdeɣ ad igeɣ agzul i tqeḍɛit n tneqqiḍin tigejdanin i yuman f umsuddes n usekwan n Tmaziɣt neɣ yerwes-it ad atent yeḍfer.

1. Asersi n tumayt d yiswan n usekwan:

Tɣawsa tamezwarut ad nessen matta ara ad yilin deg usekwan a seg yirmuda, ad nig taɣessa i tikli nneɣ bac ur nettaḥal-c deg wemmas n urmud, ma yeddes wahil u yeqɛed ad banen u ad nnubin yiswan yellan ad aten nexleḍ s terrayt teɛdel ma nezra mani nil f umezwaru zdat wa ad yebdu usekwan. Yuma daɣen f umsuddes ad yaki belli ma iswi agejdan seg usekwan d aselmed, tumayt texḍa ɣir d aselmed, eddrari trajan ad afen tɣawsa temlexḍa f temsirin ig nnumen deg usmil aɣurbiz ig yessmharen ɣer-sen ihi asekwan ilaq ur yettil-c ammin, d way aɣef ilaq ad yili d aselmed d usidles s yirar d umeḥred d taḍṣa u way ad yili s umsal n ufus, asuneɣ, eccna, tiqsiḍin d tsirarin. Tumayt a d Yirmuda ya bettun s usersi n umsuddes i yiswan.

2. Taguzdit n yigurdan ilmend n wahil:

Isekwan n yigurdan d tagnit i wenmaggi n edderri id n tussniwin d uselmad neɣ umsuddes d netni jar-asen, afran n tguzdit ɣer-s tawuri tameqqrant yuma ad ilin edderri uzan deg tilla d uswir n ulmad bac ad yeshel f umsuddes aqeddec id-sen d wekkay d umzagez deg jar-asen.

Yuma daɣen ad nessen ma mmussanen zik neɣ araḥ, ma ttuthlayen Tmaziɣt neɣ araḥ, azal n wessan nsen i Tmaziɣt. Sumata edderri yettutlayen Tmaziɣth ad ten-naf faten heyya gellan ur tet ssinen-c deg unmaggi id n umsuddes beṣṣeḥ f uneggaru ad tḥared manek edderri yettutlayen kan Eddarja tzagazen deg heyyin u xsen ad utlayen am netni u day mani yuma f umsuddes ad ten ifares. Aled ad ilin xeddmen neɣ ttiraren. La ten beṭṭac ɣer yiwetman d twetmin, eǧǧ iten msuren.

Igrawen texḍiḍ d cek yellan aten yig, eǧǧ asen tilelli ad qqimen mani xsen u ad nnebḍan d igrawen manek xsen netni u ma xsen ad beddlen aten ad ac cawren cek bac ad teqqimed teṭṭfed deg usekwan nnek.

3. Tiremt n isekwan:

Isekwan n yigurdan ttawin labas n wakud, aten yetteǧǧan ttemhiren d wa aɣen yetteǧan ad nwaza jar tumayt n usekwan d tiremt i as yemmugen, tqumed ad as tiged ass yejmel beṣṣeḥ armud n uselmed ad yili tnezzayt berk (seg tsaɛt ɣer sent n tsaɛatin) ag qqimen seg wakud ad yennebḍa ɣef yirmuda imedwanen am umsal n ufus d usuneɣ d usteɛfu n umekli, imerdin irmuda imagrawen am eccna. Taggayt n uselmed ad tettili deg yirmuda ya akk beṣṣeḥ s terrayt a agrud ur yettemhir-c.

4. Asewjed n wallalen iwwasen:

Am yirmuda isdawanen ukk, amsuddes ad yessewjed taqeḍɛit n wallalen ad t-newwlen deg leqdic nnes zemren ad ilin d isaggazen am tmedfas d tedlisin, neɣ d imezṛiyen am tubbayyin n tinezla, tizlatin.

Deg waddad n usekwan n Tfinaɣ yexyar ad d-yawi umsuddes taseggazt di-s isekkilen n Tfinaɣ berk bla twaɛit neɣ tasuqilt neɣ d asegzi s tutlayin teyyiḍ, igurdan ad lemden sɣer-s netta tira d usiwel nsen s Tmaziɣt beṣṣeḥ ad tennan ɣer tifert bac ad mmekthin u ma unfin tasuqilt s yisekkilen ig ssnen zik (Ilatinen neɣ Iɛraben) ad asen truḥ tefdawt u ad tennubi teywalt id n uselmad neɣ umsuddes n usekwan, rni ɣef wa tasuqilt tetteǧǧa ɣer edderri tawleft deg walli nsen tteqqnen di-s asekkil n Tfinaɣ ɣer wa n Tlatint neɣ n Teɛrabt, tasuqilt daɣen tettneqqes taflest n ugrud deg tutlayt nnes u ythnna yettccukkut di-s ma d tutlayt d tilellit f tutlayin in u ma tqum ad ttili s yiman nnes. Ma yewwi-d amsuddes tubbayyin n tnezla yuma ur yettettu-c ad ilint d tigilalin ur tfatent-c 10 n tedqiqin, ma yella d tiwlifin ad ttwafesrent ɣef wefṣil neɣ ɣef tfelwit n ufsar bac ad ilint tbanent i wegrud, ttettu-c belli tawuri n wallalen a d awwas berk yexḍa ad ilint d asaɣul ad ɛewlen fell-as deg kulci.

5. Afran n wadeg neɣ umeccuh d wallalen n usekwan:

Deg ufran n umeccuh i deg ad yemmug asekwan yessefk ad ttili di-s taɣellist, ma teẓriḍ taɣawsa di-s amizi f eddrari kkes itt am leqzaz, uzlan, ifulan n trisiti…atg. Yexyar ma di-s tamsext n tɣellist d ttiqan, agama n eddrari ttesteɛfun labas d way a ɣef yuma ad nefren ameccuh mani yella abduz id n wesɛif ad aten yawi u ad aten d-yuɛa, mani yemmug urmud id n yimeẓẓyanen ad ilin waman n tsessi, hazeqqa ad ttili ur heḥmi ur hesmiṣ, ad tili tfawt. Lbab neɣ tamsext ad tili s abellaj yetteqqen si sdaxel bac icet ur d-yettaddaf.

Seg wallalen i neḥwaj deg tzeqqa ad bedreɣ iseqquma d tdabutin, d lebrizat. I edderri nexs tiferka d yimrawen n tira d usuneɣ…atg.

Yeḥla mda ad yili umeccuha yuza ɣer teɣremt u ad yili umsuddes netta ig ibedden ɣef kulci ur yettɛewwel ak f yict.

(Ad yettwaḍfer …).

Sumiya Ḥeṛṛat (taselmadt n tutlayt Tamaziɣt).

Aɣerbaz alemmas n Bellefḍel Bayzid.

Elḥamma – Maskula (Xencla), Awras, Dzayer.








 
Iwenniten n imeɣṛan
تعليقات القراء
Readers' comments


comments powered by Disqus
 


Tamezwarut
الأولى
Homepage
Murakuc
المغرب
Morocco
Dzayer
الجزائر
Algeria
Lmed Tamaziɣt
تعلم الأمازيغية
Learn Berber
Tamkaṛḍit Tamaziɣt
المكتبة الأمازيغية
Berber library
Amawal Amaziɣ
القاموس الأمازيغي
Berber dictionary