Tamezwarut
الأولى
Homepage
Murakuc
المغرب
Morocco
Dzayer
الجزائر
Algeria
Lmed Tamaziɣt
تعلم الأمازيغية
Learn Berber
Tamkaṛḍit Tamaziɣt
المكتبة الأمازيغية
Berber library
Amawal Amaziɣ
القاموس الأمازيغي
Berber dictionary

Tiɣɣuṛma



 
Muḥemmed Aɣezzaf
Muḥemmad Aɣezzaf

                       Tiɣɣuṛma

Ad yili cra n umadan taɣeṛma nnes ma ay d ar ittini? Matta wamag nettacez zeg tiɣɣuṛma n kra n uɣref akkʷ matta netta?


Iseqsiten ad mrayen bahra minzi ran cigan n uswigem far ad negger i trarit ɣif-sen. Ad nannay mas ikka ufgan issusen taɣeṛma.


X uɣbalu n «Lexilogos» ugmeɣ asussen waniti:


La civilisation: 1- Fait de se civiliser. 2- Ensemble de ce qui caractérise les grandes sociétés humaines: la religion, la morale, les acquis scientifiques et techniques, etc.

Tamennida nnes g Teɛṛabt: ثقافة، تمدين، تمدن، مدنية، حضارة، تحضر  

S Tmaziɣt, taɣeṛma tga t:

1- adday innuɣṛem cra, 2- tagrumma n akkʷ mayed issɣeḍmen amunen ufginen ixataren: ahedrun, tarefsa, imaɛinen isunanen d isenzalen, atg.
Iɣ nbedda ɣif usussen ddeɣ ad nsuflu (déduire):


-Is tbedda tɣeṛma ɣif tagrumma urid yan uferdas.


-Is tga ayenna issɣeḍmen amunen ufginen ixataren.


-Is tezdey d uhedrun, tarefsa, d imaɛinen isunanen d isenzalen.


Tirsal n tɣeṛma:


-Axermis axatar n ufgan urid n umudar, urid yan uferdas ufgin.


-Ahedrun, tarefsa, usun, asenzel …


Aseflil ddeɣ ar aɣ igelley ɣif wad nemmseqsa ɣif mayed igan amun ufgin axatar?


Id ixater s ufḍin n iferdasen nnes mid ixater s wamag n wis ila tizzulya (la valeur) tamajjyalt. Mec ttufergel tixitert tufḍint, ar matta awettu?


Ur ittubdir uwettu ufḍin. Heyya ku axermis ufgin, imci nna ira ad t ig, ila taɣeṛma nnes. S mi?


-Ig iga uhedrun yan wazda ger ufgan d umeɣni nnes hat ur ikkul ad ifles ku axermis g yan umeɣni akkʷ ma, ur ikkul ad imuhed s yan imec akkʷ ma.


-Iḥ iman uhedrun g trefsa hat ur ikkul ad yili ku axermis (groupement humain de petite ou de moyenne importance, peuplade, selon un écrivain) irafisen nnes.


-Ineḥ idder uxermis ɣif yan usatam (espace) hat ur ikkul ad yarey iɣef nnes zeg ucelḍiy, timjiwac, umetna, d udfel. Heyya ad ikcem s ifri neɣ iska agʷerbi, neɣ taxendaccut, neɣ taḥenḍṛut, tigemmi, ibergmmi…, mar ad iddel ajanig nnes s timelsit swa s ifer n waddag, neɣ agʷlim n umudar, neɣ inzaḍen nnes neɣ taḍuṭ nnes, neɣ s incew n iskallaɛen, ad yaweɣ swa g tfiyyi n waylalen neɣ imitar yaɣen taraksut nnes. Aya iga udmawen n usenzel d imaɛinen isunanen. S mi?


Asag yuser (avoir besoin) ufgan ad yarey (protéger) amessuy nnes zeg udmawen n unezwi ixxan hat ad iswingem g imaliḍen ma s ittesku azedduɣ nnes, ur ikkul ad yannay iselli d tallaɣt neɣ irris (argile), ur ikkul ad issiley yan ucbar s imaliḍen ddeɣ, s uya ila usun n uskar (neɣ asunsker: savoir-faire). Ur ikkul diɣ ad yannay tallaɣt teqquṛ aha teskeflilley ɣ uzmez n uzirez alley tekkʷar s ibexsa alley tga amm iceqfa n ca n usekkin afercix.


Ur ikkul ad isuflu is iẓenẓaṛen ittiqiqen n tafuyt ar ttesɣaṛen tallaɣt, i ma ax ad ur yarem ad iggʷ tallaɣt aha imsel imis nna ira amm uqelluc aha isɣeṛ t s tafuyt neɣ s takat lumen kud t izutef ? Aya iga yan udmu (concept) ɣif usekrey (La fabrication) n ifecka n irris. Imci s ami da ttiɣileɣ is ikka ufgan azayku ar iswingim far ad yaf arudzem (la solution) i ukaris nnes d wanemri nnes.


S mendat izutef anagen n wacal, aha isɣeṛ ten s takat aha fsiyen dat as, kud semmiḍen sraren aqsaḥ nsen. I ma ax ad ur yarem ad issefsey uzzal taf ad issekrey azduz d imassen yaḍen?
Imiq s imiq, ar ittedmu iskkinen nna izennen (avoir besoin) aha ar ten ittehkac s wuzzal, s ukeccuḍ, s uqezzuy (iɣeṣṣ). Ca s ittedder ittemhaz usunesker nnes. Azutef n temsi iga yan uduḥel ilan tawuri acku s takat issusged mennaw n irsan (les métaux), s takat ar ittarey amessuy (corps) nnes zeg uflaḍ, ar ismuttuy isekkin iquṛaṛen, iqesḥen s ileggʷɣen, uḍɣiɣen, d iḥrarayen neɣ ungiyen, s takat ar issiwid amudar aḍuṛas asxerwaz, s takat ar issenwa aksum nna ikkes i umudar. Yudsa azutef  n takat kud iwwet s tmica yan wansa aha uyellan ifeṭṭiwijen s ugudey alley yaɣ uballaɣ (flamme).

Idma takat amm yan ulakib (force) issiwiden, aha imuhed t mar ad ur as tessekmaḍ amessuy neɣ azedduɣ. Yannay diɣ neɣ isella i usman jdern yan umudar di neɣ yan ufgan din. Idma usem amm is iga yan ugari nna s da ikkat umeɣni afgan neɣ amudar far ad t ismuyel (sanctionner) ifken t mar ad ur t ijder. Ilula uhedrun g wacal aha immuttey s igenna. Ar ittiɣil is illa fella-s yan unmater (contrôleur) n isakiren nnes. Iɣ yucer han imeɣni yannay t aha ur ikkul ad t issekmeḍ s usem. Teg takat tadugamt (symbole) n uslubbeḍ (anéantissement), yan watta (esprit) nna ur as d yusi ad ur t isfuzel.


Yuccel ad as tnem twada far ad issitem iɣef nnes i tunant. Tawada inemn tga awettu n ta dda ifeṛɣen.
Tlula trefsa. Yuser ufgan ad yarey amessuy nnes, ikkes agʷlim n umudar nna irra amm ufunas, izimmer, aɣaḍ aha iddel is. S mendat (progressivement) yurem taḍuṭ d inzaḍen, ar isselwum ifilan nsen, ar ittekmas ifilan alley gan taratsa, iles t yufa dis tiṛɣi. Kud ila ger ifassen nnes imassen yaḍen, issemres ten alley ilkem aḥermil (le niveau) n dɣi.


Asunesker n uzeṭṭa ikka iga ugyin, ar ittemhaz alley ilkem aḥermil ukris. Aya iga asenzel ilulan dar ufgan azayku, aha g ujerrid n wukud, ar ittemhaz (évoluer) alley yiweḍ udem nnes atrar. Illa ḍaṛt imassen iqbuṛen amm imaynuten yan usun imehzen s umendat alley ilcem aḥermil nnes anemtuta. Ikka ufgan aqbuṛ ar ittemsawaḍ s isillifen far ad issefru ayenna n wawal (voix) ittefɣen imi nnes.


Mar ad imzalal ger iwaliwen, ifka i ku wawal akarij nnes ɣif tifliliyt, ɣif iɛzufen n igujjifen, ɣif ugʷlim n imitar nna issegred. Ismun ikarijn ddeɣ g yat tayukt (unité) aha izdey t s usekkin nna izutef amm useknaf (allen, imjjan…) neɣ islliwen, aman, acal… Ifka as anaba (le sens) nnes. Ar ittemhaz wawal s umendat, g ujerrid n wukud, ar issaɣ imassen nna ismuttey amm iɣṣan n imitar nneɣ nna iɣna ɣif yan udem ittemsasan d unemri nnes s tayukt n isekkilen.


Iswingem far ad issaɣ asekkin nna yufa neɣ iɣna. Ilula iles isselkamen tawengimt tugyint imci nna tekka zi bisemdi (depuis jadis). Kud ittenyuddu iles ger iferdasen n yan uyetmi (le clan, la tribu) ittezur, itteɣzif, ittyarer (être vacciné) s ilsawen n iyetman imerjalen (voisins).

Ilula umyarar n ilsawen. Mec da ttinin isenlasen (les linguistes) is ur igi iles xas allal n usefru n twengimt, n idmuten (les concepts), n igzuten (les notions), maca iga imisy n tdelsa hat iman ids neɣ imyaway d ids alley iga yan udem zeg udmawen nnes. Iɣ ar aṭṭun isnefganen ger tadelsa tusliht d tamatant, hat ar tessefriqqis tdelsa s ma s tella (reflèter) aṛaɛa n ufgan azayku d umaynu g tyazilt nnes, g ugama as igan asuty, g uwtem d tawtmt, g umudar. Iḥ neɣṛa yat tudyizt, neɣ umiy (légende), adamin (fable), anafis (conte), tasisawt (nouvelle), asisaw (petit roman), anagif (roman) ur nekkul ad naf idisan ddeɣ imci nna adday nesɣilel (contempler) yan usabir (rite), yan unasiy (tradition), yan umayir (habitude) ad naf akkʷ iferdasen ddeɣ.


Is ila Umaziɣ tiɣɣuṛma nnes?


Dat n wad rareɣ ɣif iseqsi agi yuf is serraɣ zeg iles Amaziɣ, zeg tawalt n tɣeṛma d mayed ids imsen. Ar ttinin itsen Imaziɣen n wammas i yan usku n iselli d tallaɣt ittyaḍṛen d walim, ilan kuẓ n iweddimen (Tours), ittuskan i usṭaṛ (le dépôt) n ilazizen (les marchandises) iɣṛem nna mi da qqaṛen Imaziɣen n iffus Agadir. Ar t i ttinin itsen i tgemmi taxatart. Iɣṛem iga asku immyawan d uzutef n ukʷfas (la culture) acku ar gi-s tteffern Imaziɣen imendi d uzatim, udi, tamment, d itagiren nsen (les documents)… Iga tamatart n ubenɣel (la stabilité) acku zeg is ila Umaziɣ asunesker n tuẓẓut d ukʷfas as ibenɣel tama n igran nnes maca ur izri tiksi (takessa) n imitar nna issegred (apprivoiser), acku ar as takka aksum, agʷlim, taḍuṭ, inzaḍen neɣ izeblan, akʷfay, udi, aɣɣu...


Takessa ar ti tgelley ad ismuttey ansa nnes ɣ uncek n umir (tagerst, anebdu), s ifeɣlil (Action de garder le bétail loin de chez soi nuit et jour selon Mr Ahmed Haddachi). Afarem (la pratique) n iramiden (les activités) udmisen igliy t ad idmu (concevoir) tigemmi nnes igan axeṛbic nna iska s iselli d tallaɣt, aha iddel t s udaris (rang) n iḥniyen d teḥniyin (les poutres, les poutrines), aha islutem (entasser) ɣif-sen yan wanaw n wacal, day yudja tinibba issekcamen asidd, neɣ issufuɣen aggu s afella.


Idma axeṛbic nnes amm is iffeɣ zeg udrar, neɣ tawrirt alley mec ira ca ad yaley s tebḍant (plafond) ar ittekka ḍaṛt uzedduɣ asel n wad issemres tisekkilya (échelle). Iska t ɣif yan usanaz (forme) isemdaren i iramiden udmisen, iska aɣajam ur ilin xas yan wakam t issekcamen far ad yasey imendi nnes, yuǧǧa yan usatam (espace) s ijguten (les colonnes) i imitar nnes (ulli d tiɣeṭṭen) far ad ten yarey zeg uflaḍ (le froid) aha issaɣ t s umaylal, yuǧǧa diɣ yan uɣajam (chambre) s ustes (mangeoire) nnes i uyyis neɣ i userdun, neɣ i uɣyul nnes, yuǧǧa diɣ wayyaḍ i ifunasen, issegrem (résérver) yan ufital i inebgawen nnes.
Aya ar issenɛad is iswingem g imc n tiski swa n iɣṛem ismun ayetmi neɣ axermis, neɣ tigemmi igan tusliht (privée) nna mi da iqqaṛ axeṛbic, lumen itsen Imaziɣen, acku win iffus ar ttinin axeṛbic i wansa n tmezgida nna g ssiriden imẓilla iseknafen nsen dat n wad ẓẓallin. Maca ur issin xas udem ddeɣ n tiski, hat issen awed anaw n tgemmi imyalayen, neɣ udem n ubergmmi neɣ aḥerraḥru nna da ittesku g ugecraraḍ (position dominante, point difficilement accessible, selon un écrivain) amm itsen iɣeṛman.


G iles Amaziɣ ar nettafa assaɣen amm tisefri ittinin talayt tamajjyalt n tgemmi, tizeqqi ittinin aɣajam n ddaw wacal ittusegermen i wufur n imendi, d ugnar i uɣajam amajjyal akkʷ i wufur, tallunt i waday amazdar n tgemmi, akluy i wansa illan anir n tgemmi, aɣgemmi i uɣajam issekcamen s tgemmi (vestibule), aknul i wansa n umater, asutey i uyenna innḍen i uzedduɣ, agella neɣ tasetturt i tewrut n wulli d tiɣṭṭen. Di nna illa iɣṛem neɣ ugadir hat tella yat tegrumma (ensemble) n iwdan nna ur ilin yan ufaḍin udsis (nombre limité).


Ar ttinin Imaziɣen diɣ aɣṛum. Ma ay d izdiyen aɣṛum d iɣṛem? Axes ur igi ayenna ikecmen iɣṛem wan imendi (irden, tumẓin…)? Da ttiɣilɣ is ur igi xas ayenna nniɣ acku Imaziɣen ar ssaɣen ca n usekkin s ugalim (adjectif) nnes amm adday inin aɣyul (brun) igan agalim n inil (couleur) i umudar nna ittyassen ɣ uncek Mass Oumad Mohammed, neɣ nnan tuɣṛift i takrunt (forme ronde de pain) iddeɣ da si-s tɣeṛṛef tasdent itteggʷan aggʷren (awwren) far ad tessenw aɣṛum.


Ur ikkul ad immuttey unaba n usekkin ad zeg umatan s uslih. Ikka tin ar ittini imendi ikecmen iɣṛem aha idwel ar ittini asanaz n wučči mi iga waday nnes (sa base) awwren n irden neɣ tumẓin neɣ axellad (amezgur, asengar). Mec iga iɣṛem yan waẓey n tiɣɣuṛma hat iga uɣṛum wayyaḍ.


Iddeɣ ur ttuyaqqilen Imaziɣen ad ḥbibḍen (conserver) ayenna sṭeṛn farsen izerfan d izmaz. Afares n izerfan d izmaz isufer i wudus n wamun. Afares ddeɣ tamatart n uswingem izdiyen d usda (la réalité) taf ad frun Imaziɣen ikarisen nsen izdiyen s unires (la sûreté) d tiɣɣulsa (la sécurité), minzi s usnires d useɣles as da ittili ubenɣel g tmazirt. Abenɣel iḍulley i ufares.


Afares ukʷfis ar ittemmyaway d ubenɣel. Ad ilkem ufgan s umata, d Umaziɣ s unfal aḥermil n wad issufeɣ zeg ifsan aɣṛum hat ur isrirey, aha yuser uya asemres n imassen wan tazzlaft d uzutef n wafa (takat, tamsi). Aya ar issenɛad yan umuttey uɣṛim imci nna da issenɛad yan umhaz n iles, acku ku asekkin ilulan ar iglley (obliger) id babin d isetlal nnes ad as afin/afint assaɣ ma s inna ad ittyassen. Is da ittlal wassaɣ asel n unumzeg (intervention) n ufgan asag ilula usekkin mid bab nnes neɣ lal nnes ayed t issaɣen? Dat n wad rareɣ ɣif useqsi ddeɣ ixatren riɣ ad ssectiyeɣ s mayed inna usenlas ameqran Tcumski (Chomsky) n wis iga iles tanuluft neɣ aɣnanay. Iɣ ittuɣna ufgan ɣif usanaz nna nessen akkʷ aha ar as itteffeɣ wawal imi han awal ittuɣna neɣ iga tanuluft. Id iles s unaba n tagrumma n iwaliwen ilan yan unaba iccaren ger iferdasen n yat tegrumma tufgint hat iga tiɣni n ufgan s tyazilt nnes.
Man imec? Mec nenkuser (nserra) zeg wannaz (l’époque) nneɣ ad nannay is afgan ifarsen imis ayed t issaɣen acku assaɣen imaynuten ur ǧǧin kkin kud ur ta lulan imassen imaynuten. Iles iga ayenna ifares ufgan aha msasan ɣif-s iwdan swa s imec usrid neɣ s ik arusrid s unaba n unyuddu n wassaɣ ger iwdan iddeɣ ittuyassen usekkin ikecmen tamazirt nsen s wassaɣ nna s fkan id babin neɣ isetlal nnes. Aya zeg yan waẓey, id zi wayyaḍ mec nesrey assaɣen ad nna ikka Umaziɣ iɣna far ad issaɣ itsen iḥeclafen ad nzutef aḥermil n usenflel dar-s:


*Ilesfunas :Iles (aseknaf) + afunas (amudar), iddeɣ ila uḥelfis waniti asanaz amm win ufunas isselɣ iles i ufunas far ad ifek assaɣ amaynu i usekkin ad.


*Iferbaɣus: Ifer (aferdas, aseknaf) + abaɣus (amudar), iddeɣ ila uḥelfis agi ifer igan amm ufus n ubaɣus x usanaz, isselɣ ifer i ubaɣus amm is ila umudar ddeɣ ifer aha islal tawalt tamaynut igan dɣi assaɣ i usekkin waniti.


*Aḍaṛtbir: Aḍaṛ (aseknaf) + atbir (amudar), iddeɣ ila uḥelfis ddeɣ aḍaṛ amm win utbir, isselɣ aḍaṛ i utbir taf ad yaf ad issaɣ asekkin ad.


Ggudin wassaɣen uddisen itteggan imedya ɣif tiɣni n yiles Amaziɣ zund ilemdis, iɣezdis, aɣeṣmar (assaɣen n iseknafen)... Ayenna issenɛaden is iswingem Umaziɣ g isekkinen nna ikka iɣna neɣ nna izutef, neɣ idsey (importer) far ad yaf ad ten issaɣ. Afares n iles ur ikkul ad imyaway d ufares n tdelsa s unaba nnes uslih d umatan.


Aṛaɛa n Umaziɣ g tyazilt nnes, g ugama, x umudar, g tawtmt nnes, g wamun illa x mayed ifares ɣ iḥermilen ad s sin idsen. Ikka tin ar isfuzul anẓaṛ. Anasiy n uɣenja iga yan udem n umuhed dar Imaziɣen meqqaṛ ar ittufaram zeg iḥenjiren d tḥenjirin acku iga tutra n unẓaṛ asag illa uzirez.


Ikka ar ittiɣil Umaziɣ is ar isseblulus unẓaṛ awed tisednan ur ittarun, ayenna as ar tterdabent s tmeqqa nnes far ad urunt. Aya ar ittusentam s wassaɣ n tiselt n unẓaṛ, s taḥḥuyt nna da ttasint tḥenjirin d uɣenja igan imis n wučči.


Azan n unasiy ddeɣ n ufkan (amuhed) ar ittini is yura uɣenja n teslit, is ar isdiddiy ufẓu (la famine) amun, is ran/rant zeg ucamin nsen/nsent igan anẓaṛ ad isseblules (féconder) acal taf tzubdu (continuer) tudert.
Anasiy (tradition) waniti ar issenɛad aṛaɛa n Umaziɣ aqbuṛ x ugama, g tawtemt, ɣ wamun. Taḥḥuyt tga tadugamt (symbole) n teslit, tislit da tessenwa tiram ar tessemras aɣenja, tislit tga igejdi n tigemmi, iɣ ur telli ur da ittili učči, iḥ ur illi učči ur da ttili tudert. Učči ikka-d aseɣzew (fertilisation) n unẓaṛ i wacal, neɣ aseblules nnes i tawtemt.


Aṛaɛa nnes s tawtemt yaksul d win wacal. Anẓaṛ ar ittɣebdal (irriguer) acal, ar issa ufgan, awtem ar ittili ibelɣuyen, ar isseblulus tawtemt, ar tturew, mec tga tamgagrut (stérile) ur ttuyaqqil ad tetter aseblules usrid n ucamin igan anẓaṛ s urdab nnes ddaw tmeqqa nnes. Ayenna issefrun yan umiy Amaziɣ ittinin is tekka tin yat twessart tusey ayeddid ɣif tadawt nnes aha teggufey s tqeccumt n udrar day twejjeɣ aha tini: nec ayed iɣnan tullut (l’existence) aha israr t ucamin s umeddargu (rocher).
Umiy agi ar issenɛad aṛaɛa n ufgan Amaziɣ lumen tawtemt g tyazilt nnes d ugama. Tga iɣef nnes timeɣnit n umaḍal aha teggufy. Ayeddid iga yan imis as ttasin iwdan aman, ur ikkul ad ig tadugamt n useknaf nnes nna da issirir uwtem s ibelɣuyen nnes (les spermes).
Maca iddeɣ tesbijjeg (être fière) s tiɣni nnes aha tezruret (nier) taganta (action) tarusridt (indirecte) n ucamin igan anẓaṛ ɣif ubrid n uwtem t isseblulsen israr t ucamin s umeddargu ur yakkan amya, igan amm yan ugudiy n iɣṣan ur isufiren i umya (qui n’est valable pour rien).


Tawtemt tga acal nna da isseblulus unẓaṛ. Tudert tlula zi tamunt n wacal d waman, zeg tamunt n tawtemt d uwtem. Iɣ ur llin waman ur ttili tudert meqqaṛ illa wacal. Ayennaɣ as imuhed Umaziɣ anẓaṛ aha issaɣ inilen ittefraren (paraître) g igenna asag isrew s tislit n unẓaṛ, ayennaɣ as isul icebber g unasiy igan asabir, ayennaɣ as isul da ittegger i wacal aha issuden afus nnes meqqaṛ izdel (adopter) ihedran yaḍen (religions).


Is yamu Umaziɣ g tɣeṛma tamaḍlant mid uhu?


Dat n wad rareɣ ɣif useqsi agi ixatren riɣ ad ssectiyeɣ s mayed ikka inna usedyan Caɣl Andɣi Julyan ɣif idlisen Imaziɣen iqbuṛen nna issenhubber (endommager) ca n ucengu akkʷ ma nna ikka isug tamazirt. Maca ur nessin ma s ttyaran id-s iles Amaziɣ mid ca yaḍen.

Ɣ uncek n tugga (témoignage) n isedyanen (historiens) ikka ugellid Yuba Amezwaru neɣ Wiss Sin yamu g usun aqbuṛ, imci nna yamu Ufulay g unagif, d uswagman Uɣeṣṭin g uswingm, d ufelzaf n udayin, asertal n usunmen Ɛebderreḥman Iwi-s n Uxeldun x usedyen d ufelzef n udayin, d umirem Ɛebbas Iwi-s n Ufernas nna yurem ad yayel zeg yan uweddim anejgagal aha yaɣ acal igez t, maca amun s ilsawen yaḍnin amm Ulatin d Uɛṛeb.
Ur ikkul ad ilin wiyyaḍ nna ur ssineɣ neɣ ur ta ten izutef awed yan. S ucrad (vraiment) ad yaru cra s iles ur igin winnes ur inni ad as ikkes tanettit nnes. Maca llan itsen ar tsenbaren (considérer) asneflel n Mass Cukri Muḥammed d Aɛṛab iddeɣ yaru s iles Aɛṛab meqqaṛ ur iffir tamusi nnes Tamaziɣt, mɣaṛ ilsa aḥruy yusin tamatart n Imaziɣen, asekkil n yaz.


Ayennaɣ as iḍulley (être nécessaire) ad yuru ku asneflal s iles nnes, d usekkil nnes mec illa far ad ifek tamatart n tullut d tudert nnes, mar ad ur as yacer ca tamenga nnes (gloire). S tirra as ittmuttuy ufgan zeg uḥermil utliy (oral) s udcil (écrit). S tirra as da ittili yan wudem zeg wudmawen n tɣeṛma igan adlis.


Adlis iga wan usalay (musée), ar itteḥbibiḍ aswingem n yan wamun akkʷ ma. Adday yiri ca n ucengu ad islubbeḍ wayyaḍ da as issekmaḍ takafut n idlisen nna yaru neɣ nna ila. Ur illi mayed ikkaten taɣeṛma n yan wamun g wabuḍ nnes anect ajdar n idlisen nnes d usenhubber n timitar n tɣeṛma nnes. Llan wudmawen yaḍen igan timitar n tɣeṛma Tamaziɣt amm uzeṭṭa d ileqḍen nnes, d izuzaf n uẓṛef d wuṛeɣ.


G iɛbanen ar nettafa aqeydur, taqebbut, aẓennaṛ neɣ axidus, neɣ azamlal, neɣ ajɣiɣ d tqeydurt, ikurbin, iducan, abruɣ (caftan), aḥendir, aɛebṛuq, tasebniyt, ilbeḍ, akerbay bu agʷwwal neɣ aberbaj, ajerdal, d ibidi (manteau), tawendit (manteau sans manches) taraswayt (robe)...
Id izuzaf, han azbeg, itli, taseɣnest, tiẓeṛẓit, aqqayen, tasmert, isni... Akkʷ isekkinen ddeɣ d wiyyaḍ lan assaɣ nsen g iles Amaziɣ, ayenna issentamen is ku amadan iɣnan yan usekkin ar as itteɣnu assaɣ nnes amm ifecka n usenwi: agra i imis n usrugg n seksu, d tarikut neɣ tikint nna g issenwa ickan (légumes) d uksum d usrew ma s itterway asekkif neɣ taḥrirt d uberrway d tmenɣaɣat (awwern inwan g waman).


Ad nannay is iles Amaziɣ imyaway d isekkinen nna idma Umaziɣ aha iɣna ten far ad semdren (répondre) i wanemri (besoin) nnes.

Ad ur nettu imassen n uẓawan amm tallunt d butegzut d umzad d tɣiḍa, d waskiwen, d tqerqawin, d uganga d wiyyaḍ d udmawen n uṛkaḍ agrumman wan uḥwac d uḥidus, d udmawen n iriran wan urasal, usalaw, izwirken, tasukant (izlan nna as ttirirnt tsednan g tmeɣṛa), tamawayt, asnimmer (izli nna as da ittirir ca far ad inṣef inebgawen nnes). Ad ur nettu asanaḍ n uɣebdel (irrigation) ittettren aseɣcel (géométrie).


Aɣezzaf Muḥemmad, tagrest n 2965 / 2015








 
Iwenniten n imeɣṛan
تعليقات القراء
Readers' comments


comments powered by Disqus
 


Tamezwarut
الأولى
Homepage
Murakuc
المغرب
Morocco
Dzayer
الجزائر
Algeria
Lmed Tamaziɣt
تعلم الأمازيغية
Learn Berber
Tamkaṛḍit Tamaziɣt
المكتبة الأمازيغية
Berber library
Amawal Amaziɣ
القاموس الأمازيغي
Berber dictionary